يوميات اتنين متجوزين عمر وساره الحلقة (2)

الصباحيّــة




قــالت ســارة

:

صحيت من النوم وماعرفش انا فين.. اقعدت ابص للمكان بدقة وانا ادور على اوضتى القديمة مش لاقياها ووجدت عمر نايم على السرير فانتفضت كنت هصوت .. ثم افتكرت كل شيء.. وأخذت أضحك في سرّي وانا بفتكر أمي وهي تقول لي: انتي يا سارة لما بتصحي من النوم ممكن تطلبي البوليس للّي قدامك عقبال ما تعرفي انتي فين ؟

عندها حق لازم اتخلص من العادة دى مش كل يوم ح أصحى الراجل مفزوع كده

وايه يعنى مااصحيه كل يوم مفزوع ماهو جوزى حبيبى يستحمل بقا

ولاقيت جرس التليفون يرنّ من زمااااااااااان وخرجت على أطراف أصابعي حتى لا أوقظ عمر.. . ولاقيتها ماما كما توقعت.. الحمد لله انها لم تكن حماتي




ماما: صباح الخير يا ست العرايس.. صباحيّة مباركة

أنا: صباح النور يا حبيبتي

ماما: انا ما نمتش خالص قلقانة عليكي

أنا: الحمد لله كويسة

-آه لو الامهات تبطل القلق ده-

ماما: طيب يا سارة احنا ح نيجيلك بعد الضهر شوية

أنا: تنوّري يا ماما

طبعا ماما أُحبطت من ردي.. خلاص فعلا حاسة ان لي حياة مستقلّة واني مش لازم اقول كل حاجه لماما.. وبعدين عاوزة ماما تتعود على الوضع ده علشان ما يحصلش مشاكل بعد كده




وضعت السماعة ولاقيت التليفون يرنّ تااااانى .. واضح ان تليفوننا هو الوحيد في مصر.. لاقيت مكالمة مشابهة من حماتي وانهم برضه ح ييجوا بعد الضهر

والدعوة عامة وحتبقى لمّة وهيييييييييييييييييييييييييييه

***********

صحى البيه بسلامته عمر وهو بيضحك ويقول: صباح الفل يا حبيبتي اهو ده الصباح ولاّ بلاش.. بجد ملكة حتى وانتي صاحية من النوم

ابتسمتُ له وقلت أسدّ نِفسه بسرعة فقولتله ان كل العالم ح ييجيلنا بعد الظهر يعني بعد ساعة تقريباً

لاقيته يقول: يا ستي يشرّفوا بس بجد المفروض ان الأهل يسيبوا العرايس شوية ياخدوا على الوضع الجديد وعلى الحياة الجديدة مش هجوم كده من أولها.. ماهمّ لسه سايبنّا من كام ساعة.. حيكون حصل لنا ايه يعنى؟.. ايه الرخامه دى دول ناس رخميييييين

وبعدين انا ما نمتش طول الليل من شخيرك يا سارة

شخيري !!!؟

وكان ردي رميته بكل مخدات الأنتريه واديته درس لا ينساه فى احترام حرمه المصون اللي هيّ أنا احسسسسسسن يستاهل

عمـر: يا ساتر يا رب ده انتى شرّانية أوي.. الواحد ما يعرفش يهزّر معاكي شوية؟

أنا: لا يا سيدي ما عندناش رجالة يهزروا.. يالاّ تعالى نشوف ح نقدم للجماعة ايه

ودخلنا المطبخ وأعددنا ما سنقدمه للضيوف واعدنا ترتيب المنزل علشان الناس اللي ح تيجي تتفرّج على الفرش الجديد وغيّرت هدومى ولبست طقم جديد وحذاء بكعب عالي لأول مرة وربنا يستر واعرف امشى فيه

وخلاص بقى ح اعيش فى دور المدام.. وجدت الباب بيرن ووجدت الاسرتين سوا مش عارفة ازاي؟




لقيت نفسي مفروض أستقبل حوالي 18 فرد مرة واحدة.. ليه كده بس؟

ما علينا.. المشكلة الأزلية ان الناس اللي بتيجي بتتفرّج على كل الشقة حتى المطبخ.. يعني المفروض ان اول ما الناس يشربوا حاجة أغسل الكاسات فوراً علشان الفرجة تبقى كاملة

وهكذا لقيت نفسي تحولت الى نحلة مكوكية اشيل وأحط وأغسل وأفرّج الزباين.. أقصد الضيوف.. على الشقة حتة حتة

ومش عارفة ليه العروسة بتفتح النيش والدواليب وكل الفرش وكل الأطقم لكل واحد ييجي؟؟.. فعلا حرب المفروض الضيوف ييجوا يقعدوا في الصالون فترة بسيطة ويلقوا نظرة سريعة على الفرش ويباركوا ويمشوا وخلاص وبلاش التفتيش الذاتى ده.. لكن تقول ايه الواحد كان اتجوز فى الصين أحسن

***********

قــال عمــر

:

ايه الشغلانة دي ؟.. ده بيت ابويا ما كانش زحمة كده

الناس دي ح تمشى امتى؟

انا تعبت.. وسارة ياعيني ما قعدتش لحظة ولمّا جيت أشيل معاها الصواني ماما قالت لي: يعني عمرك ما ساعدتني في البيت يا عمر ؟

الحمد لله ان سارة كانت فى المطبخ مش ناقصين نكد

***********

قــالت ســارة

:

وأخيراً أخيراً مشيوا وانا اكاد أبكى من التعب لأني اصلاً لسه تعبانة من مجهود الفرح.. حرام الظلم ده

وجدت ماما تميل على وهيّ ماشية وتقول لي خلى بالك من نفسك يا سارة وماتتعبيش نفسك (مش عارفة ازاى؟).. وعلى فكرة خالك وخالتك واولادهم جايين لكم بعد العصر شوية ..... . وعمة عمر وجوزها واولادها جايين بالليل

!!!!!!!!

حرااااااااااااااااااااااااام عايزه استريح شويه





_____________________


متنسوش تعلقو برايكم في القصه


الكاتب